اسی روز گرلز کالج کا افتتاح مولانا طاہر مدنی کے ہاتھوں عمل میں آیا۔
رپورٹ: ریحان اعظمی، یواین اے نیوز، منگراواں (اعظم گڑھ)جمعرات کے روز منگراواں میں تعلیم و تربیت کے دو اہم اور خوش آئند واقعات پیش آئے۔ ایک طرف الامین نیشنل اسکول کا سالانہ پروگرام منعقد ہوا، جس میں بچوں نے قرآن خوانی، نعت خوانی، تقاریر اور دینی خاکے پیش کر کے خوب داد سمیٹی، تو وہیں دوسری طرف ایک نئے گرلز کالج کا باضابطہ افتتاح بھی عمل میں آیا، جو علاقہ کی بیٹیوں کے لیے تعلیم کا ایک نیا دروازہ کھولے گا۔
الامین نیشنل اسکول کا پروگرام:
پروگرام کا آغاز تلاوتِ قرآن پاک سے ہوا، اس کے بعد بچوں نے روح پرور انداز میں نعت، حمد، اور اخلاقی موضوعات پر مبنی خاکے پیش کیے۔ اساتذہ اور اسکول انتظامیہ کی کئی روز کی محنت رنگ لائی، اور ابتدائی دو گھنٹے تقریب نہایت عمدہ طریقے سے چلی۔ تاہم بارش کی وجہ سے اختتامی سرگرمیاں متاثر ہو گئیں۔
ڈائریکٹر احمد ریحان فلاحی نے ایک ویڈیو جاری کرتے ہوئے کہاکہ:
"یہ صرف ایک دن کا نقصان ہے، لیکن بچوں کا جوش، محنت اور لگن دیکھ کر ہمیں یقین ہے کہ ہم بہت جلد دوبارہ ایک شاندار پروگرام کے ساتھ لوٹیں گے۔"
گرلز کالج کا افتتاح:
اسی دن علاقے کے لیے ایک اور اہم لمحہ اُس وقت آیا جب معروف عالم دین مولانا طاہر مدنی صاحب کے دست مبارک سے ایک نئے گرلز کالج کا افتتاح عمل میں آیا۔ اس موقع پر بڑی تعداد میں علما، سماجی شخصیات، والدین اور مقامی افراد موجود تھے۔
مولانا طاہر مدنی نے افتتاحی خطاب میں کہا:
"تعلیم نسواں وقت کی اہم ترین ضرورت ہے۔ اس ادارے کے قیام سے بیٹیوں کو ان کے گھر کے قریب معیاری تعلیم حاصل کرنے کا موقع ملے گا، جو ایک مثبت سماجی تبدیلی کی بنیاد بنے گا۔"
یہ دونوں تقریبات علاقے کی تعلیمی ترقی اور فکری بیداری کی علامت ہیں۔ عوام نے ان اقدامات کا خیر مقدم کیا اور اسکول و کالج انتظامیہ کے لیے نیک تمناؤں کا اظہار کیا۔
کوئی تبصرے نہیں:
ایک تبصرہ شائع کریں