اورنگزیب کا پتلہ جلانے کے باعث ناگپور میں تشدد،20 سے زائد گرفتار ،دو جی سی بی نذر آتش ،متعدد پولیس زخمی!
ناگپور: اسماعیل عمران (یو این اے نیوز 18مارچ 2025) ناگپور میں اورنگزیب قبر تنازعہ کے باعث مہاراشٹر میں تشدد پھوٹ پڑا ہے ۔ مہاراشٹر کے ناگپور سے پیر کے روز مار پیٹ اور آتش زنی کی خبریں سامنے آئی ہیں۔
یہاں دو کمیونٹی کے درمیان پتھراؤ کے بعد علاقے میں کشیدگی کی صورتحال پیدا ہو گئی ہے۔ اس دوران کئی گاڑیوں میں توڑ پھوڑ کی گئی اور دو جے سی بی مشینوں کو آگ لگائی گئی۔ تشدد کی زد میں آ کر ڈی سی پی سمیت کئی پولیس اہلکاروں کے زخمی ہونے کی اطلاع ہے۔
میڈیا رپورٹس کے مطابق، ناگپور کے محل علاقے میں پیر کی رات 8:30 بجے وشو ہندو پریشد نے اورنگزیب کا پتلا نذر آتش کیا تھا۔ اس کے بعد علاقے میں تشدد بھڑک اٹھا اور دو فریقوں کے درمیان پتھراؤ شروع ہو گیا۔ بے قابو بھیڑ نے اس دوران کئی گاڑیوں میں توڑ پھوڑ اور آتش زنی کی۔
دو جے سی بی مشینیں بھی جلا دی گئیں۔ بڑی تعداد میں پولیس فورس کی موجودگی کے باوجود فسادی نہیں رکے۔ یہاں تک کہ ڈی سی پی ارچت چاندک پر ہجوم نے کلہاڑی سے حملہ کیا۔
تشدد میں کئی پولیس اہلکاروں اور دیگر لوگوں کے زخمی ہونے کی خبر ہے۔ پولیس نے 25بلوائیوں کو حراست میں لے لیا ہے۔ ڈی سی پی ارچت چاندک نے کہا کہ غلط فہمی کی وجہ سے یہ واقعہ پیش آیا۔ صورتحال اب قابو میں ہے۔ سب سے اپیل ہے کہ باہر نہ نکلیں اور پتھراؤ نہ کریں۔ کچھ پولیس اہلکار زخمی ہوئے ہیں۔ میرے پاؤں میں بھی ہلکی چوٹ آئی ہے۔
ریاست کے وزیر اعلیٰ دیویندر فڑنویس نے لوگوں سے انتظامیہ کا مکمل تعاون کرنے کی اپیل کی ہے۔ انہوں نے کہا کہ ہم مسلسل پولیس اور انتظامیہ کے رابطے میں ہیں۔ ناگپور ایک پرامن شہر ہے۔
کسی بھی افواہ پر یقین نہ کریں۔ دوسری جانب، نائب وزیر اعلیٰ ایکناتھ شندے نے کہا کہ یہ حملہ منصوبہ بندی کے ساتھ کیا گیا۔ پولیس پارٹی پر پتھر پھینکے گئے۔ ایسا کرنے والوں کو معاف نہیں کیا جائے گا۔ بلوائیوں کے خلاف سخت کارروائی کی جائے گی۔
ناگپور میں تشدد کے واقعے کے بعد ممبئی میں پولیس سیکیورٹی بڑھا دی گئی ہے۔ مالونی، بھنڈی بازار، کورلا، شیواجی نگر-ماں خرد جیسے مسلم اکثریتی علاقوں میں مقامی پولیس کو چوکس کر دیا گیا ہے۔ ممبئی پولیس نے بھی مختلف علاقوں کے تمام مذاہب کے اہم لوگوں سے رابطہ کر کے کسی بھی قسم کی افواہ پر یقین نہ کرنے کی اپیل کی ہے۔
دراصل، اورنگزیب قبر تنازعہ کے سلسلے میں پیر کے روز مہاراشٹر میں وشو ہندو پریشد نے جگہ جگہ احتجاج کیا تھا۔ ناگپور میں بھی اسی کے تحت اورنگزیب کا پتلا جلایا گیا تھا، جس کے بعد دو گروہوں کے لوگوں میں جھڑپ ہو گئی۔
پھر دونوں طرف سے پتھراؤ اور آتش زنی شروع ہو گئی۔تازہ اپڈیٹ 17 مارچ 2025 کی رات 11:35 بجے تک کی اطلاعات کے مطابق، ناگپور میں صورتحال اب مکمل طور پر قابو میں بتائی جا رہی ہے۔ پولیس نے مزید 10 افراد کو حراست میں لیا ہے، جس سے گرفتار شدگان کی تعداد 35سے زائد ہو گئی ہے۔ زخمی پولیس اہلکاروں اور شہریوں کو اسپتال میں داخل کرایا گیا ہے، جہاں ان کی حالت مستحکم بتائی جا رہی ہے۔ ڈی سی پی ارچت چاندک کے پاؤں کی چوٹ معمولی ہے اور وہ فرائض انجام دے رہے ہیں۔
پولیس نے واقعے کی تحقیقات شروع کر دی ہیں اور سی سی ٹی وی فوٹیج کی مدد سے دیگر ملزمان کی شناخت کی کوشش کی جا رہی ہے۔ مہاراشٹر حکومت نے اعلان کیا ہے کہ نقصانات کا جائزہ لے کر متاثرین کو معاوضہ دیا جائے گا۔
اس کے علاوہ، سوشل میڈیا پر افواہوں کو روکنے کے لیے سخت نگرانی کی جا رہی ہے اور لوگوں سے تصدیق شدہ ذرائع سے ہی اطلاعات لینے کی درخواست کی گئی ہے۔ ناگپور کے علاوہ، مہاراشٹر کے دیگر شہروں میں بھی احتیاطی تدابیر بڑھا دی گئی ہیں تاکہ تشدد کو پھیلنے سے روکا جا سکے۔
کوئی تبصرے نہیں:
ایک تبصرہ شائع کریں