سعودی۔(یو این اے نیوز 15اپریل 2020)سعودی عرب سے خصوصی پرواز کے ذریعے پاکستانی عمرہ زائرین وطن واپس آرہے ہیں۔سعودی ایئرلائن کی خصوصی پرواز ایس وی 3734 بدھ کو دن ایک بجے 251 عمرہ زائرین کو لے کر جدہ سے لاہور کے لئے روانہ ہوگئی۔
جدہ میں پاکستانی قونصل جنرل خالد مجید اور ڈپٹی قونصل جنرل شائق احمد بھٹو عازمین کو رخصت کرنے کے لئے ائیرپورٹ پر موجود تھے۔حکومت پاکستان کی جانب سے سفیر راجہ علی اعجاز اور قونصل جنرل خالد ماجد نے ان پروازوں کے انتظام میں تعاون کرنے پر خادم حرمین شریفین شاہ سلمان بن عبد العزیز، ولی عہد شہزادہ محمد بن سلمان، سعودی حکومت اور وزارت حج و عمرہ کا شکریہ ادا کیا۔
انہوں نے سعودی عرب میں ٹھہرنے کے دوران پاکستانی عمرہ زائرین کے لیے بہترین انتظامات کرنے پر وزارت حج و عمرہ کی تعریف بھی کی۔ سعودی حکومت نے تمام مسافروں کے لیے نہ صرف ٹھہرنے کا بندوبست کیا، بلکہ ان کو کو طبی امداد بھی فراہم کی اور ان کے
عمرہ ویزے میں بھی توسیع کی جو اس صورتحال کی وجہ سے ختم ہوگئی۔ انہوں نے سعودی سول ایویشن اور سعودی ایئر لائن کا بھی شکریہ ادا کیا۔ تقریبا 474 پاکستانی عمرہ زائرین بین الاقوامی پروازوں کی منسوخی کی وجہ سے سعودی عرب میں رہ گئے تھے اور جن کو سعودی ایئر لائن کی پروازوں کے ذریعے پاکستان بھیجا جا رہا ہے۔
بدھ کو یہ پرواز پاکستانی عمرہ زائرین کو لے کر پاکستان روانہ ہوئی ہے۔ دوسری پرواز جمعرات کو بقیہ مسافروں کو لے کر ملتان کے لیے روانہ ہوگی۔ان پروازوں کا اہتمام سعودی وزارت حج و عمرہ کے خصوصی انتظامات کے تحت کیا گیا ہے۔
عمرہ زائرین کے لیے کی جانے والی یہ غیر معمولی دیکھ بھال دونوں ممالک کے مابین بہترین برادرانہ تعلقات کی علامت ہے اردو نیوز کے ان پٹ کے ساتھ
کوئی تبصرے نہیں:
ایک تبصرہ شائع کریں